الرئيس يخاطب شعبة الحبيب
يا شعبى حبيبى ياروحى يابيبى يا حطك فى جيبى يا ابن الحلال
يا شعبى يا شاطر يا جابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
يا شعبى اللى نايم وسارح وهايم وفى الفقر عايم وحالة دا حال
احبك محشش مفرفش مطنش ودايخ مدوخ واخر انسطال
احبك مكبر دماغك مخدر ممشى امورك كدة باتكال
واحب اللى ينصب واحب اللى يكدب واحب الى ينهب ويسرق تلال
واحب اللى شايف وعارف وخايفوبالع لسانة وكاتم ماقال
واحب الى قافل عيونة المغفل واحب البهايم واحب البغال
واحب اللى راضى واحب اللى فاضى واحب الى عايز يربى العيال
واحب اللى يائس واحب اللى بائس واحب اللى محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان ماتش كورة وفيلم ومقال
واحبك تايد تعظم تمجد توافق تنافق وتلحس نعال
تحضر نشادر تجمع كوادر تلمع تقمع تضبط مجال
لكن !! لو تفكر تخطط تقرر تشغلى مخك وتفتح جدال
وعايز تنور وعايز تطور وتعملى روحك مفرد رجال
ساعتها هجيبك .. لا يمكن اسيبك وراح تبقى عبرة وتصبح مثال
هابهدل جنابك واذل اللى جابك وهيكون عذابك دا فوق الاحتمال
وامرمط سعادتك واهزأ سيادتك واخللى كرامتك فى حال هزال
وتلبس قضية وتصبح رزية وباقى حياتك تعيش فى انعزال
هتقبل هحبك ... هترفض هلبك ... هتطلع هتنزل هجبلك جمااااااااااااال
موضوع: القصيده الممنوعه من النشر 
